Lees: Luk. 7:18-35
Gedagte vir kinders: Deur Jesus se kruis kan ons huil oor ons sonde en
lag oor ons verlossing.
Oorsig: Hierdie
gedeelte toon drie duidelike dele. In v.18-23 lees ons van Johannes die Doper
se vraag aan Jesus asook sy antwoord daarop. Daarna gee Hy aan hulle ’n beoordeling
van Johannes die Doper en ons hoor die mense se reaksies (v.24-30). En dan hoor
ons die Here Jesus se reaksie op die mense se reaksies op sy bediening en die
van Johannes as sy voorloper (v.31-35).
Johannes
was ’n profeet, maar profete word nie lank verdra as hulle mense se sonde
aantoon nie. Johannes die Doper was in die tronk omdat hy selfs koning Herodes
vermaan het omdat hy sy broer se vrou afgeneem het. En daar sit hy toe in die
tronk en hoor van die dade van die Messias, maar alles gebeur nie presies soos
wat Johannes verwag het nie. Heel moontlik het Johannes, soos ons, verwag het dat
dinge vinniger en kragtiger moes gebeur sodat God se koninkryk duidelik sou deurbreek
in hul eie omstandighede. Die Here Jesus wys egter op sy kragtige dade van
genesing. Daarmee het Hy bevestig dat hy die werk doen waaroor profete soos Jesaja
reeds lankal geprofeteer het (Jes. 35:5-6; 26:19; 29:18-19; 61:1). Daarmee het
hy aan Johannes en ander bevestig dat Hy wel besig was om die Skrifte te vervul
en dat Hy wel die Messias is en dat elkeen salig is wat nie aanstoot neem aan
Hom nie (v.23).
Die Here Jesus het toe vir die skare aangedui dat Johannes die Doper ’n baie besondere profeet. Hy was die vervuller van Maleagi se profesie en daarom die voorloper van die Messias (vgl. Mal. 3:1; v.27). Niemand in die Ou Testament was groter as hy nie, juis omdat hy op die Messias gewys het. En tog het die Here Jesus iets merkwaardig hierby gevoeg. Hy het gesê dat die kleinste in die koninkryk groter is as Johannes die Doper.
Dit beteken dat die gelowiges in die nuwe verbond moet
besef watter verskil Christus gebring het toe Hy die nuwe verbond ingebring het
deur sy kruisdood en opstanding. Die gewone volk en tollenaars het hierop
reageer deur hulle te laat doop, maar die Fariseërs en wetgeleerdes het nie
geluister nie. Die Here Jesus het toe die reaksies beoordeel. Hy het dit vergelyk
met kinders se speletjies op die mark oor saamhuil en saamlag waar die een
groep die ander kwalik neem dat hulle nie saamspeel nie. Die rede is dat
Johannes die Doper gekom het met ’n lewe van strengheid waar jy huil oor jou
sondes, maar mense het gesê dat hy ’n duiwel het. Die Here Jesus het toe gekom
met ’n lewe van genade en feesvier en mense het gesê dat Hy ’n vraat en
wynsuiper is. Hulle wou dus eintlik nie na God se boodskap luister nie, maar net
na hulleself.
Besprekingsvraag: Wat beteken dit dat die kleinste in die koninkryk
groter is as Johannes?
Insig: Johannes
die Doper bevestig dat selfs die grootste gesante van God kan kom by tye en
plekke waar hulle nie sin kan maak van alles nie. Ons het eenvoudig nie al die
feite nie, en ook nie insig in God se tyd nie. Dit oefen ons ook daarin om in
die geloof op Hom te steun en nie ons eie insigte nie (vgl. Spr. 3:5-6). Onthou
telkens dat God oneindig wyser as ons is. Ons moet ook leer by Johannes en soveel
Psalms oor wat om te maak met ons onsekerheid. Neem dit na die Here self. In
hierdie geval het die Here baie konkreet gewys op sy dade en beloftes wat in
vervulling gegaan het. Dowes wat hoor en blindes wat sien was tog totaal
ongekend. Geloof hoef nie blindelings te gewees het nie. Die vervulling was
besig om te gebeur, maar dit moes langs die weg van die kruis gebeur. Kerkvaders
soos Luther het daarom dikwels gewaarsku teen ’n teologie van glorie sonder om
die teologie van die kruis te onthou. Laat ons altyd daaraan vashou dat God ons
ook langs die moeilike weg seën. Kyk maar net na Christus.
Die weg van die kruis was die enigste
wyse waarop die nuwe verbond in Christus ingelei kon word (Luk. 22:20). Johannes
die Doper was hierin die brugfiguur. Hy was die laaste profeet van die ou
verbond en baie groot, juis omdat hy die weg voorberei het vir die Messias. Die
volk kon die Messias nie waardeer sonder reiniging en bekering nie. Johannes se
bediening het ’n groot en verrassende breuklyn in Israel oopgemaak – die wat
vir en die wat teen Christus was. Die Here Jesus bevestig die werk van Johannes
en daarmee saam dat die ou en nuwe verbond nie teenoor mekaar staan nie. Maar
Hy wys ook op die uitnemende voorreg van die gelowiges van die nuwe verbond.
Die kleinste in die koninkryk is groter as Johannes in die ou verbond. Die rede
is eenvoudig: Christus se versoening het ’n werklikheid geword en die kinders
van die nuwe verbond kan saam met Johannes staan in die heerlike werklikheid
van die geregtigheid en al die seëninge wat Christus gebring het.
Maar ons moet hoor dat God tot optrede
en reaksie in die krag van sy Gees oproep. Daar is ’n saligheid vir diegene wat
nie aanstoot neem aan Christus wanneer dinge nie vir hulle sin maak nie (v.23).
En ons moet raaksien dat die strengheid oor sonde waarvoor Johannes gestaan het
en die feestelikheid wat Christus gebring het, ook nie teenoor mekaar staan
nie. Die ware kinders van God reageer op beide en waardeer dit as ’n eenheid.
Die een wie se hart verkeerd is, vind kritiek op beide aspekte. Kinders in die
nuwe verbond ken egter die weg van huil oor sonde en lag oor die verlossing. Dit
is hul roem, hul taal, en hul lied.
Geraadpleegde werke:
Darrell Bock, Luke, NIV Application
Commentary
R.C. Sproul, Luke, An Expositional
Commentary
R.T. France,
Luke, Teach the Text Series.
