Gedagte vir kinders: Ons
moet elke dag gereed wees om die Here Jesus te ontmoet.
Oorsig: Ons lees in Mattheus 24 dat
die Here Jesus weer kom, in die geskiedenis en uiteindelik met die wederkoms. Vanaf
die einde van hoofstuk 24 en in die hele hoofstuk 25 lees ons spesifiek dat Hy
sal oordeel en hoe ons daarop voorbereid kan wees. Die Here vertel aan die
begin van hierdie hoofstuk hoe die koninkryk van God eenmaal sal wees. Dit sal
wees soos tien jongvroue (maagde: simbool van rein lewens) wat hulle lampe
geneem en uitgegaan het om die bruidegom te ontmoet (v.1). In daardie dae het
die ongetroude bruidsmeisies saam met die bruid by baar huis gewag vir die
bruidegom om haar te kom haal. Dan het almal feestelik saam beweeg na die
bruidegom se tuiste waar die huweliksfees gehou is.
Onder hierdie tien jongvroue was vyf verstandig en vyf dwaas
(v.2). Die rede was dat die dwase maagde geen olie met hulle saamgeneem het wat
kon help dat die lampe langer sou brand as die bruidegom nie dadelik kom nie. Die
verstandige meisies het wel ekstra olie in hulle kanne saam met hul lampe
geneem (v.3-4). En toe die bruidegom talm om te kom, het almal van hulle vaak
geword en aan die slaap geraak (v.5.). Teen middernag het daar ’n uitroep
gekom: “Daar kom die bruidegom; gaan uit hom tegemoet!” (v.6)
Toe staan al daardie jongvroue op en maak hulle lampe gereed
(v.7). Die wat dwaas (onverstandig) was, het toe aan die verstandiges gesê: Gee
vir ons van julle olie, want ons lampe is besig om dood te gaan (v.8). Die
verstandiges het toe geantwoord: Miskien is daar dan nie genoeg vir ons almal
nie. Gaan julle liewers na die verkopers en koop vir julleself (v.9). Dit was
nie noodwendig selfsugtig nie, want hulle kon ook gedink het aan die Bruidegom
en watter oneer dit sou wees as almal se lampe doodgaan voordat die verrigtinge
klaar is. Dit was ook moontlik om ekstra olie te gaan koop in die nag, al sou
dit wel tyd neem.
Terwyl die vyf jongvroue egter gaan om te olie te koop, het
die bruidegom toe wel gekom. Die wat gereed was, het toe saam met die bruidegom
ingegaan na die bruilof en die deur is gesluit (v. 10). Later kom die ander
jongvroue toe ook daar aan en vra: Meneer, meneer, maak vir ons oop! Maar Hy
het geantwoord en gesê: Voorwaar, ek sê vir julle, ek ken julle nie (v.12). En
toe het die Here Jesus die gelykenis vir hulle toegepas: Waak dan, omdat julle
die dag en die uur nie weet waarop die Seun van die mens (Jesus Christus) kom
nie (v.13).
Besprekingsvraag: Hoe
sorg ons dat ons voorbereid is vir die Bruidegom?
Insig: Hierdie gedeelte leer ons oor twee van die groot leerstellings van die Kerk van Jesus Christus: Die laaste dinge (eskatologie) en die leer van die volharding van die heiliges.
Alles loop af op ’n
definitiewe heerlike einde en almal volhard nie hieroor tot die einde toe nie. Soveel
in die Kerk gee die indruk dat hulle weens materialisme, hedonisme en ’n
sekulêre gees, nie meer glo dat Jesus Christus weer kom om te oordeel oor die lewende en die dode nie.
In die Ou Testament het die bruidegom gedui op God en sy verhouding met die
volk Israel (vgl. Jes. 1-3; 54, 62; Jer. 1-3; Hos. 1-3; Es. 16, 23), maar ook op
die Messias-Koning se verhouding tot die volk (2 Sam. 5:1-3; 2 Sam. 17:1-3;
Psalm 45; Hooglied; Sag. 9:9). Jesus Christus is beide en die ware Bruidegom
wat op pad is. Hy is die sin van die geskiedenis en wie Hom ken en erken is op
pad na die grootste en mees feestelike blydskap.
Hier is egter ook ’n duidelike
waarskuwing aan alle belydende Christene. Hierdie 10 maagde weet almal van die
Bruidegom en erken selfs dat Hy kom. Die maagde is simbool van reinheid: Hulle
wat hul lewe nie oorgegee het aan ongebondenheid nie, die wet onderhou, en
barmhartig is oor hul medemens. Kortom, die maagde staan vir kerkmense. En tog
is sommige verstandig en sommige dwaas. Waarom? Ons gedeelte leer dat sommige
dwaas (dom) is, omdat hulle nie werklik leef in dit wat hulle bely nie. Daarom
is hulle is ook nie werklik voorbereid vir die Bruidegom te midde van die uitdagings
van die lewe nie. Dit is geweldige waarskuwing vir elkeen wat bely dat hulle
deel van die Kerk van Christus is.
Hoe gee ons gehoor aan die
waarskuwing? Ons hoef nie gespanne te leef omdat ons netnou-netnou onkant
betrap kan word nie. Ook die verstandige maagde het aan die slaap geraak (vgl.
1 Thes. 5:10), maar hulle het gelowig gelewe, hul eie heil uitgewerk, en daarom
was hul olie in plek (vgl. Fil. 2:12-13). Die olie is al aangedui as liefde (1
Kor. 13), as vreugde (Ps. 45:7; Jes. 61:3; Hebr. 1:9) en as die Heilige Gees (1
Sam. 16:3; Jes. 61:1-2; Rom. 5:5; Gal. 5:22). In breë trekke dui dit egter
gewoon op ’n verstandige lewe waar iemand besef wat dit beteken dat ons by
Christus vir die langtermyn aangemeld
het. Dit beteken dat ons deurlopend voorberei om uiteindelik voor Hom te
staan. In eie krag kan ons nie volhard tot die einde toe nie, maar in Christus
wat reeds volhard het tot die einde toe, en in die krag van sy Gees, kan ons. Ons
werk dit in ons daaglikse lewe uit deur gebed (Luk. 11:13), deur die geloof in
Christus (Gal. 3:2, 5,14), deur die gebruikmaking van die Woord en sakramente
(Hd. 2:38). Uiteindelik beteken dit eenvoudig dat ons glo in die Hom, die
Bruidegom, wat van ons bruilofsgaste gemaak het. Dit beteken dat ons optree en
voorberei en waak asof, ja omdat, dit die waarheid is.
Werke geraadpleeg
John
Bergsma, The Word of the Lord. Year A.
Frederick
D Bruner, Matthew: A Commentary.
Lawrence R Farley, The Gospel of Matthew: Torah for the Church.
